Félagið Matur-saga-menning (MSM) og Grindavíkurbær standa fyrir uppskriftakeppni um besta saltfiskréttinn 2012. Matreiðslumennirnir Sigurvin Gunnarsson og Friðrik V. Karlsson meðlimir í MSM velja fimm uppskriftir. Hægt er að senda uppskriftir í tölvupósti til 
  This e-mail address is being protected from spambots. You need JavaScript enabled to view it
  í síðasta lagi 23.mars.

Vinningsuppskriftir verða valdar í lok Menningarviku Grindavíkur 17. - 25. mars, sjá nánar um fjölbreytta dagskrá á www.grindavik.is

1. verðlaun eru kr. 30.000,  2. verðlaun kr. 20.000, 3. verðlaun kr. 10.000, 4. verðlaun kr. 5.000 og 5. verðlaun kr. 5.000. Vinningsuppskriftir verða sýnilegar á vefsíðum www.matarsetur.is og www.grindavik.is. Í Menningarviku mun Salthúsið í Grindavík bjóða upp á saltfiskrétti sjá www.salthusid.is

Félagið Matur saga menning
www.matarsetur.is
facebook: matur saga menning

Allt er gott sem af korni kemur. - Endurreisn kornræktar á íslandi

Félagið Matur-saga-menning býður til fundar um kornrækt og kornneyslu fyrr og nú. Kornrækt hefur aukist á Íslandi og margar nýjungar komið fram.

Fundurinn verður haldinn fimmtudaginn 23. febrúar kl. 20:00 - 22:00  í Matvís, Stórhöfða 31 110 Rvk, aðkoma að neðanverðu við húsið,

Framsögumenn eru:

Jónatan Hermannsson - Kornrækt fyrr og nú.

Eymundur Magnússon í Vallanesi - Kornrækt, framleiðsla og sala á  vörum úr korni.

Reynir Þorleifsson bakarameistari - Bakstur úr korni, möguleikar,  tíska og hollusta.

Að loknum framsögum verða almennar umræður.

Allir velkomnir meðan húsrúm leyfir; ókeypis aðgangur.

Félagið, Matur-saga-menning
www.matarsetur.is
Facebook: matur saga menning

Félagið Matur - saga - menning hefur fyrirlestraröð sína í vetur með því að bjóða til fundar um Norræna eldhúsið, en það er nýtt fyrirbæri í matarmenningunni. 

Árið 2004 gáfu norrænir kokkar með Claus Meyer, eiganda veitingahússins Noma í Kaupmannahöfn, út yfirlýsingu um að tímabært væri „að skapa nýja norræna matargerðarlist, þar sem bragðgæði og önnur sérkenni eru fyllilega sambærileg við fremstu matargerðarlist í heiminum." Hugmyndin fékk góðan stuðning norrænu ráðherranefndarinnar og hefur vakið mikla athygli víða um lönd. Hvaða áhrif hefur þessi hreyfing haft? Á hvaða hugmyndum byggir hún? Er eitthvað til sem heitir norrænt eldhús? Þessum og öðrum spurningum um norræna eldhúsið verður leitast við að svara á fundinum.

Fundurinn verður haldinn í Norræna húsinu fimmtudaginn 10. nóvember kl. 20:00.

Framsögumenn eru:

Mads Holm, verkefnastjóri fyrir Nýr norrænn matur á Íslandi, Úlfar Eysteinsson, veitingamaður og Jón Þór Pétursson, þjóðfræðingur.

Að loknum framsögum verða almennar umræður.

Allir velkomnir meðan húsrúm leyfir; ókeypis aðgangur. Hægt verður að kaupa veitingar á veitingastðanum Dill í Norræna húsinu.

Félagið: Matur - saga – menning

www.matarsetur.is

facebook: matur saga menning

Fimmtudaginn 28. apríl n.k. heldur Ole G. Mouritsen prófessor við Syddansk Universitet opinn fyrirlestur um nýtingu þörunga í matargerð. Fyrirlesturinn verður í sal Norræna Hússins, kjallara, kl. 19:30.

Þörungar eru mikilvægur hluti af matarræði almennings í mörgum löndum Asíu. Notkun þeirra í matargerð hefur hinsvegar ekki náð fótfestu á vesturlöndum nema að litlu leyti. Þörungar geta verið afbragðs matvæli, bragðgóð, stútfull af mikilvægum steinefnum, snefilefnum, vítamínum, próteinum, joði og heilsusamlegum fjölómettuðum fitusýrum. Þar að auki innihalda þörungar gnótt af trefjum og þar af leiðandi fáar hitaeiningar. Þörungar munu án efa verða stærri hluti af matarræði okkar í framtíðinni. Það sem er ekki síður mikilvægt er að þetta "sjávargrænmeti" getur hjálpað okkur að endurnýja og ná jafnvægi í matarræði okkar til að vinna á móti aukningu í lífstílstengdum sjúkdómum, einkum hjarta- og æðasjúkdómum, krabbameini, offitu auk geðsjúkdómum.

Ole G. Mouritsen, er höfundur bóka um matargerðalist og vísindin á bak við hana. Rannsóknir hans tengjast breiðu sviði grunnvísinda og nýtingu þeirra í líftækni og líflæknisfræði. Hann er virtur félagi í danska vísindasamfélaginu og hefur hlotnast fjöldi af virtum verðlaunum fyrir verk sín.

Aðgangur er ókeypis og öllum opinn.