Matur-saga-menning er landsfélag áhugafólks um mat og matarmenningu, stofnað 16. febrúar 2006.

Hlutverk félagsins er að efla þekkingu á íslenskum mat og vekja áhuga á þeim menningararfi sem felst í matarhefðum og matargerð. Félagið hefur staðið fyrir fræðslufundum og uppákomum af ýmsu tagi og kynnt þætti í sögu mataræðis á Íslandi, matargerð, hráefni eða vinnslu.

Markmið félagsins er ekki síst að styðja við og efla rannsóknir, kynningar og þróun á matarhefðum um land allt. Sumarið 2008 gekkst félagið m.a. fyrir ferð í Breiðafjarðarhéruð í samvinnu við Ferðafélag Íslands. Þar var bragðað á krásum héraðsins, rifjaðar upp gamlar uppskriftir og hefðir, jafnframt því sem boðið var upp á nýrri útgáfur af réttum úr breiðfirsku hráefni.

Það var svo haustið 2008 sem félagið stóð að sínum stærsta viðburði en það var sýningin Reykvíska eldhúsið, matur og mannlíf í hundrað ár. Sýningin var haldin í samstarfi við ReykjavíkurAkademíuna og Miðstöð munnlegrar sögu og með tilstyrk og velvilja Reykjavíkurborgar og menntamálanefndar Alþingis.

Söfnun á gömlum uppskriftum frá ólíkum landshlutum og héruðum er ofarlega á óskalista félagsins. Tekið er feginsamlega við ábendingum og upplýsingum frá hverjum þeim sem vill leggja félaginu lið í því efni. Koma má upplýsingum til félagsins og/eða gerast félagi í Matur-saga-menning á heimasíðu félagsins www.matarsetur.is. Einnig má skrifa félaginu bréf á heimilisfangið: Matur-saga-menning, ReykjavíkurAkademían, Hringbraut 121, 107 Reykjavík.